“Buyuk ipak yo‘li” majmuasi – O‘zbekistonning dunyoga keng ochilayotgan darvozasi
“Buyuk ipak yo‘li” majmuasi – O‘zbekistonning dunyoga keng ochilayotgan darvozasi
O‘zbekiston Respublikasi Prezidenti Shavkat Mirziyoyev “Buyuk ipak yo‘li” xalqaro turizm markazining ochilish marosimida ishtirok etish uchun 23 avgust kuni Samarqandga keldi.
Markazdan o‘rin olgan “Boqiy shahar” majmuasi hovlisida samarqandlik nuroniylar, ziyolilar bilan samimiy suhbat bo‘ldi. Ushbu inshootlar xayr-barakali bo‘lishini, bunday yaxshiliklar ko‘payishini tilab, duo qilindi.
Shundan so‘ng “Buyuk ipak yo‘li” xalqaro turizm markazining tantanali ochilish marosimi bo‘ldi.
Unda davlatimiz rahbari nutq so‘zlab, barchani ushbu quvonchli voqea bilan tabrikladi.
– Xalqimizning aql-zakovati va fidokorona mehnati bilan bunyod etilgan ushbu majmua Yangi O‘zbekistonni barpo etish yo‘lidagi yana bir salmoqli, zafarli natija bo‘ldi. Qadimiy va navqiron Samarqand bag‘rida qad rostlagan mana shunday zamonaviy, ulug‘vor me’moriy majmua barchamizga, butun xalqimizga muborak bo‘lsin, buyursin, – dedi Shavkat Mirziyoyev.
Samarqand – milliy davlatchiligimizga asos bo‘lgan, tariximizdagi ikkala Renessans davrida ham muhim o‘rin tutgan shahar. Shu bois sayyohlar bu yerga asosan qadimiy obidalarni ko‘rish va tabarruk joylarni ziyorat qilish uchun kelar edi. Turizmning boshqa yo‘nalishlari uchun zamonaviy majmualar yo‘q edi.
2019 yilda Prezident Shavkat Mirziyoyev tashabbusi bilan katta ambitsiyali loyiha boshlandi – Samarqand tumanidagi eshkak eshish kanali bo‘yida, 212 gektar maydonda ulkan majmua qurishga kirishildi. Avvalo, tajribali me’mor va muhandislardan iborat xalqaro jamoa jalb etilib, puxta loyiha ishlab chiqildi. Davlatimiz rahbari bu yerga bir necha marta kelib, qurilishni milliy me’morchilik an’analarimiz va odamlarga qulaylik jihatidan takomillashtirish bo‘yicha tavsiyalar berdi. Bunyodkorlik ishlarida malakali quruvchilarimiz bilan birga Turkiya, Buyuk Britaniya, Italiya kabi davlatlarning yetuk mutaxassislari ishtirok etdi.
Shu tariqa qisqa vaqtda, pandemiyadagi qiyinchiliklarga qaramay, ushbu ulkan majmua qurib bitkazildi.
Bu ko‘p tarmoqli markaz tarkibida 8 ta zamonaviy mehmonxona, Kongress xoll, “Boqiy shahar” majmuasi, amfiteatr va ko‘plab boshqa inshootlar bor. U yiliga 2 million turistga xizmat ko‘rsatishi mumkin.
– Bu ulkan markaz buyuk ajdodlarimiz bunyod etgan muhtasham me’moriy obidalarga munosib bo‘lib, ularning tarixiy an’analarini davom ettiradi. Ushbu majmua mamlakatimizda hozirgi paytda poydevori qurilishi boshlangan Uchinchi Renessans va oldingi tarixiy davrlar o‘rtasidagi ramziy ko‘prik bo‘ladi, deb ishonaman, – dedi Prezident.
Markaz “Buyuk ipak yo‘li” deb nomlanganida chuqur ma’no bor. Bu yerda o‘sha davrga oid tarixiy manzaralar aks ettirilgan. Masalan, “Boqiy shahar” majmuasi bezaklarida qadimiy Afrosiyob devorlarida saqlanib qolgan So‘g‘d davlati hukmdorining Koreya, Xitoy, Hindiston va boshqa mamlakatlar elchilarini qabul qilish marosimi tasvirlaridan foydalanilgan.
Bu yerda qadimiy bozor, mamlakatimizning barcha hududlariga xos 40 ta hunarmandchilik ustaxonasi tashkil etilgan. Unda ustalar yog‘och o‘ymakorligi, kulolchilik, zargarlik, gilam to‘qish kabi jarayonlarini sayyohlarga namoyish etadi.
Bu mamlakatimizda sayyohlik industriyasini rivojlantirish borasidagi ulkan ishlarning bir qismi. Yangi turizm markazi kelgusi yillarda Samarqandga keladigan xorijiy sayyohlar sonini 1,5 milliondan oshirishda muhim o‘rin tutadi. Umuman olganda, kelgusi besh yilda mamlakatimizga keladigan sayyohlar sonini hozirgi 2 milliondan 9 millionga yetkazish maqsad qilingan. Eng muhimi, turizm sohasida mehnat qilayotganlar 500 ming nafardan oshadi.
Shuningdek, majmuadagi zamonaviy mehmonxonalar va Kongress xoll yirik anjumanlar o‘tkazish uchun ham sharoit yaratadi. Yaqinda Shanxay hamkorlik tashkiloti sammiti, Turkiy davlatlar tashkilotiga a’zo mamlakatlar rahbarlari uchrashuvi kabi nufuzli xalqaro tadbirlar shu yerda bo‘lib o‘tadi. Kelgusi yilda esa qadimiy shahrimizda Yevropa tiklanish va taraqqiyot banki boshqaruv Kengashining yillik yig‘ilishi va Jahon turizm tashkilotining Bosh assambleyasi ham o‘tkaziladi.
“Boqiy shahar dostoni” musiqali hikoyasi yangi markazning obrazli ifodasi bo‘ldi.
Mirzo Ulug‘bek rasadxonasidan andoza olib yaratilgan amfiteatr sahnasining o‘ziga xos dekoratsiyasi va zamonaviy texnik imkoniyatlari musiqali kompozitsiyaning nafaqat kuy-qo‘shiq va raqslar, balki rang va tasvir, turli chiroqlar yog‘dusi orqali to‘laqonli ifodalashga xizmat qildi.
Mazkur musiqali kompozitsiya kichik bir ustalar qishlog‘ida dunyoga kelgan yigitning hikoyasiga asoslangan. Qiziqarli sayohatlar haqidagi kitoblardan ilhomlangan yigit uzoq safarga otlanib, yo‘l davomida bilimlarini boyitish imkoniyatiga ega bo‘ladi. Shu bilan birga turli sinovlarni yengib o‘tadi. Uzoq yo‘lni bosib o‘tgan yigit ajoyib maskanga qadam qo‘yadi va bu yerda qachonlardir tushida ko‘rgan qizni uchratadi. U bilan turmush quradi va yana o‘z yurtiga qaytib, ijod qadr-qimmati haqiqatini anglaydi. Qum, yulduzlar, shamol va suvdan orzular shahri, ya’ni Boqiy shaharni bunyod etadi.
Xalqimiz va dunyo san’ati uyg‘unlashgan mazkur musiqiy hikoyani yaratishda yurtimizning taniqli san’atkorlari va badiiy jamoalari bilan birga xorijlik ijodkorlar ham ishtirok etdi.
Vatanimiz mustaqilligining o‘ttiz bir yillik bayrami arafasida Samarqandning “Buyuk ipak yo‘li” majmuasidan taralgan navolar va yog‘dular olis-olislarga yetib, mamlakatimizda katta bayram tantanalari boshlanayotganidan sado berdi.
