O‘zbekiston Prezidenti: Ustozlarni qadrlash va hamisha yodga olish kerak, bu yosh avlodga o‘rnak bo‘ladi
O‘zbekiston Prezidenti: Ustozlarni qadrlash va hamisha yodga olish kerak, bu yosh avlodga o‘rnak bo‘ladi
Prezident Shavkat Mirziyoyev bugun Islom Karimov nomidagi ilmiy-maʼrifiy yodgorlik majmuasiga tashrif buyurib, Birinchi Prezidentimiz haykali poyiga gulchambar qo‘ydi, deb xabar qilmoqda “Dunyo” AA muxbiri davlatimiz rahbari matbuot xizmati maʼlumotiga tayanib.
Islom Karimov bundan o‘ttiz bir yil oldin mamlakatimizning milliy mustaqilligini dunyoga eʼlon qilgan edi. Bu davlatchiligimizni va insoniy haq-huquqlarimizni tiklab, barcha yutuq va marralarimizning zamini bo‘ldi. Shu bois, Birinchi Prezidentimizga hurmat o‘z tariximizga hurmat ifodasidir.
Xotira tadbirida Islom Karimovning xalqimiz manfaati yo‘lidagi xizmatlari yodga olindi. Qurʼon tilovat qilindi.
Davlatimiz rahbari ustozlarni qadrlash va hamisha yodga olish kerakligini, bu yosh avlodga o‘rnak bo‘lishini taʼkidladi.
O‘zbekiston Respublikasi Oliy Majlisi, Prezident Administratsiyasi, Vazirlar Mahkamasi, vazirlik va idoralar, poytaxt jamoatchiligi vakillari ham Birinchi Prezidentimiz haykaliga gullar qo‘ydi.
Shunday tadbirlar Samarqand va Qarshi shaharlarida ham o‘tkazildi.
