Kuvaytlik musiqachilar O‘zbekiston davlat konservatoriyasida o‘qish istagini bildirishdi
Kuvaytlik musiqachilar O‘zbekiston davlat konservatoriyasida o‘qish istagini bildirishdi
O‘zbekistonning Kuvaytdagi elchixonasi xodimlari ushbu mamlakat Madaniyat, san’at va adabiyot Milliy kengashi a’zosi, musiqashunos Amir Ja’far bilan uchrashdi.
Muloqotda Simfonik orkestr gastroli doirasida Kuvaytda bo‘lib turgan O‘zbekiston davlat konservatoriyasi rahbari Kamoliddin O‘rinboyev ham ishtirok etdi.
Yurtimizga bir necha bor tashrif buyurgan san’atkor Amir Ja’far Shayx Jobir Al-Ahmad madaniy markazida tashkil etilgan o‘zbek simfonik orkestri konserti mahalliy san’at ishqibozlari tomonidan yuqori baholanganini ta’kidladi.
Quvonarlisi, kuvaytlik musiqachilar Toshkent konservatoriyasida magistratura va aspirantura yo‘nalishida tahsil olishga qiziqib, o‘z ijodiy mahoratini oshirishda o‘zbekistonlik mutaxassislarning ilg‘or tajribasidan foydalanish istagini bildirishdi.
Shu munosabat bilan tomonlar o‘zaro tegishli kelishuv hujjatini imzolash maqsadga muvofiqligini ma’qullashdi.
Ushbu masala bo‘yicha muzokarani O‘zbekiston va Kuvayt rasmiy tashkilotlari o‘rtasida onlayn tartibda davom ettirishga kelishib olindi.
