O'zbekistonning boy tarixiy merosi va sayyohlik salohiyati Kuvaytda taqdim etildi
O'zbekistonning boy tarixiy merosi va sayyohlik salohiyati Kuvaytda taqdim etildi
AL-KUVAYT, 12-mart. /"Dunyo" AA/. Kuvayt poytaxtidagi "The English School" maktabida o'tkazilgan xalqaro tadbirda O'zbekistonning boy tarixiy merosi va sayyohlik salohiyati taqdim etildi, deb xabar qilmoqda "Dunyo" AA muxbiri.
Anjumanda ushbu maktabda tahsil olayotgan yigirmaga yaqin xorijiy davlat vakillari o'z mamlakatlari milliy taomlari, urf-odatlari va diqqatga sazovor joylarini namoyish qilishdi.
O'zbekiston elchixona ko'magida "The English School" maktabida tahsil olayotgan o'quvchilar va ularning ota-onalari tomonidan milliy burchak tashkil etildi.
Milliy burchakdan O'zbekiston madaniyati, san'ati, sayyohlik salohiyati, milliy an'analari haqidagi materiallar va hunarmandchilik mahsulotlari namunalari o'rin oldi.
Ta'kidlash kerakki, mamlakatimiz haqidagi ma'lumotlar tadbir ishtirokchilarining yuqori qiziqishiga sabab bo'ldi. Ular O'zbekiston taqdimotini yuqori baholash barobarida yurtimizga sayohat qilish istaklarini ham bildirdilar.
