"Q8 Press": Kuvaytda O'zbekistonning investitsiyaviy, savdo va sayyohlik salohiyatiga bag'ishlangan ko'rgazma o'tkaziladi

"Q8 Press": Kuvaytda O'zbekistonning investitsiyaviy, savdo va sayyohlik salohiyatiga bag'ishlangan ko'rgazma o'tkaziladi

AL-KUVAYT, 8-may. /"Dunyo" AA/. Mamlakatimizning Al-Kuvaytdagi elchixonasi tomonidan joriy yilning 13-14-may kunlari o'tkaziladigan ko'rgazma Kuvayt ommaviy axborot vositalarida keng yoritilmoqda, deb xabar qilyapti "Dunyo" AA muxbiri.

Jumladan, ushbu davlatning yetakchi "Q8 Press" onlayn nashrida "Kelayotgan dushanba kuni O'zbekistonning investitsiyaviy, savdo va sayyohlik imkoniyatlariga bag'ishlangan ko'rgazma o'z ishini boshlaydi" sarlavhali maqola e'lon qilindi.

 "O'zbekistonning investitsiyalar, savdo va turizm imkoniyatlari bo'yicha ko'rgazma joriy yilning 13-14-may kunlari "Symphony Style Hotel Kuwait" mehmonxonasida bo'lib o'tadi", – deyiladi nashrda.

 Qayd etilishicha, mazkur ko'rgazma oziq-ovqat va ichimliklar, to'qimachilik, farmatsevtika mahsulotlari, qurilish materiallari ishlab chiqaruvchilar, sayilgohlar va kinoindustriya, elektrotexnika sanoati sohalaridagi kompaniyalarning o'zbek tomoni bilan hamkorlik o'rnatishi uchun muhim platformaga aylanishi kutilmoqda.

"Tadbir davomida ikki mamlakat ishbilarmon doira vakillari o'rtasida B2B formatidagi muzokaralar ham uyushtiriladi", – deya ta'kidlagan "Q8 Press".